கைவிலங்கின்றி மேக்கப் போட்டு நீதிமன்றத்தில் இருந்து விளக்கமறியல் – இஷாரா செவ்வந்தி தொடர்பில் எழும் கேள்விகள்!

கணேமுல்ல சஞ்சீவவின் கொலைச் சம்பவம் தொடர்பாக கைது செய்யப்பட்ட இஷாரா செவ்வந்தியை எதிர்வரும் ஓகஸ்ட் 21ஆம் திகதி வரை விளக்கமறியலில் வைக்குமாறு கொழும்பு மேலதிக நீதிவான் நேற்று உத்தரவிட்டுள்ளார்.

நேபாளத்தில் தலைமறைவாகியிருந்த நிலையில் கைது செய்யப்பட்ட இஷாரா செவ்வந்தி, இலங்கைக்கு அழைத்து வரப்பட்ட பின்னர் கொழும்பு குற்றத்தடுப்புப் பிரிவினரால் தடுத்து வைக்கப்பட்டு விசாரணைக்கு உட்படுத்தப்பட்டிருந்தார்.

இந்நிலையில், குறித்த வழக்கு இன்று நீதிமன்றத்தில் விசாரணைக்கு எடுத்துக்கொள்ளப்பட்டபோது அவர் நீதிமன்றில் முன்னிலைப்படுத்தப்பட்டார். இதன்போதே அவரை விளக்கமறியலில் வைக்க நீதிமன்றம் உத்தரவிட்டுள்ளது.

எனினும், நீதிமன்றத்திலிருந்து அவர் அழைத்துச் செல்லப்பட்ட விதம் தொடர்பான காணொளிகள் மற்றும் புகைப்படங்கள் சமூக வலைத்தளங்களில் வெளியாகியுள்ள நிலையில், அவை தொடர்பில் பொதுமக்கள் மத்தியில் பல்வேறு கருத்துகள் முன்வைக்கப்பட்டு வருகின்றன.

குறிப்பாக, அவர் கைவிலங்கிடப்படாமல் சூட்கேஸுடன் அழைத்துச் செல்லப்பட்டமை, அவரது தனிப்பட்ட பொருட்களை பெண் சிறை அதிகாரி ஒருவர் எடுத்துச் சென்றமை உள்ளிட்ட விடயங்கள் சமூக வலைத்தளங்களில் விவாதத்தை ஏற்படுத்தியுள்ளன.

இதனை அடிப்படையாகக் கொண்டு சிலர், கைதிகளுக்கான பாதுகாப்பு நடைமுறைகள் முறையாகப் பின்பற்றப்பட்டனவா என்றும் கேள்வி எழுப்பி வருகின்றனர். மேலும், முன்னதாக சிறைக் காவலில் இருந்தபோது அவரது பிறந்தநாள் கொண்டாட்டம் தொடர்பான செய்திகள் வெளியாகியிருந்தமையும் தற்போது மீண்டும் சமூக வலைத்தளங்களில் பேசுபொருளாகியுள்ளது.

அதேவேளை, ஒருவருக்கு கைவிலங்கு இடப்பட வேண்டுமா என்பது குறித்த சூழ்நிலையைப் பொறுத்து பாதுகாப்பு அதிகாரிகளால் தீர்மானிக்கப்படும் விடயமாகும். நீண்டகாலமாக விசாரணைக்காகத் தடுத்து வைக்கப்பட்டிருந்த ஒருவர் தப்பிச் செல்லும் அல்லது உடனடி வன்முறை ஆபத்தை ஏற்படுத்தும் நிலை இல்லை என அதிகாரிகள் மதிப்பிட்டிருந்தால், கைவிலங்கு பயன்படுத்தப்படாமல் இருக்கவும் வாய்ப்புள்ளதாகக் கூறப்படுகிறது.

எனவே, சமூக வலைத்தளங்களில் வெளியாகும் காட்சிகளை மட்டும் அடிப்படையாகக் கொண்டு சிறைத்துறை அதிகாரிகள் விசேட சலுகை வழங்கியதாக உறுதியாகக் கூற முடியாது.

எவ்வாறாயினும், கடுமையான குற்றச்சாட்டுடன் தொடர்புடைய ஒருவர் நீதிமன்றத்தில் இருந்து அழைத்துச் செல்லப்பட்ட விதம் தொடர்பில் பொதுமக்கள் எழுப்பும் கேள்விகளுக்கு சம்பந்தப்பட்ட அதிகாரிகள் தெளிவான விளக்கத்தை வழங்க வேண்டும் என்ற கோரிக்கைகளும் எழுந்துள்ளன.