தென்னிலங்கையில் 5 பேரை படுகொலை செய்தவன் பணி இடை நிறுத்தப்பட்ட பொலிஸ் அதிகாரி!! நடந்தது என்ன?

பெலியத்தவில் எங்கள் மக்கள் கட்சியின் தலைவர் சமன் பெரேரா உட்பட ஐவரை சுட்டுக் கொன்றவர்களில் ஒருவர் பணி இடைநிறுத்தப்பட்ட பொலிஸ் பரிசோதகர் என தெரியவந்துள்ளது.

இந்தக் கொலையைச் செய்த மற்றைய நபர் நாட்டை விட்டுத் தப்பிச் சென்றுள்ளதாகவும் புலனாய்வுப் பிரிவினருக்குத் தகவல் கிடைத்துள்ளது.

ஐந்து பேரை சுட்டுக் கொன்றுவிட்டு, ஜீப்பில் தப்பிச் சென்று, கம்புருபிட்டிய நகரில் ஜீப்பில் இறங்கி மாத்தறை நோக்கிச் செல்லும் பேருந்தில் தப்பிச் சென்றவரே, நாட்டிலிருந்து பாதுகாப்பாக தப்பிச்சென்றுள்ளார். அவர் தொடர்பான சிசிரிவி காட்சிகளும் வெளியாகியிருந்தன. தப்பிச் சென்றவர் கடற்படையிலிருந்து தப்பியோடியவர்.

துப்பாக்கிச் சூடு நடத்தப்பட்டு ஒரு வாரத்தில் விமான நிலையம் வழியாக அவர் நாட்டை விட்டு தப்பிச் சென்றுள்ளதாக விசாரணையில் தெரியவந்துள்ளது.

இரண்டாவது துப்பாக்கிச் சூடு நடத்திய பொலிஸ் பரிசோதகர் நாட்டில் தங்கியிருப்பதாக நம்பப்படுகிறது. அவர் பாதாள உலகக் கும்பல் ‘கொஸ்கொட சுஜீ’யின் நெருங்கிய கூட்டாளி என்றும் தகவல்கள் வெளியாகியுள்ளன.

இந்தக் கொலைகளுக்கு மூளையாக செயல்பட்டவர் இந்த முன்னாள் பொலிஸ் பரிசோதகர் என்பது புலனாய்வாளர்களின் கருத்து என விசாரணை அதிகாரிகள் தெரிவித்துள்ளனர். தாக்குதலாளிகள் பயணித்த ஜீப்பை அவரே செலுத்தியுள்ளார்.

பாதுகாப்பு கேமரா காட்சிகள் மற்றும் தொலைபேசி பகுப்பாய்வு அறிக்கைகள் மூலம் துப்பாக்கிச் சூடு நடத்தியவரை அடையாளம் காண முடிந்ததாக போலீஸ் தகவல்கள் தெரிவிக்கின்றன.

1983 ஆம் ஆண்டு பிறந்த இவரது பெயர் ரன்முனி மகேஷ் ஹேமந்த டி சில்வா. இவர் மகந்தானை, ஊரகஸ்மன்ஹந்திய புவக்கஹவத்த பகுதியைச் சேர்ந்தவர் என சிரேஷ்ட பொலிஸ் அதிகாரி ஒருவர் தெரிவித்தார்.

இவர் கடந்த 2007ஆம் ஆண்டு பொலிஸ் சேவையில் இணைந்துள்ளார். அவர் சப்-இன்ஸ்பெக்டராக இருந்தார்.

இந்த நபர் சுஜி கொஸ்கொட மற்றும் அவரது பிரதான சீடரான உரகஹா மைக்கேல் ஆகியோரால் திட்டமிட்டு நடத்தப்பட்ட கொலைவெறி துப்பாக்கிச் சூடு உள்ளிட்ட பல குற்றச் செயல்களுக்கு உதவியவர் எனவும் அடையாளம் காணப்பட்டுள்ளார். அந்த குற்றவாளிகளுடன் இணைந்து குற்றங்களில் ஈடுபட்டதால் அவர் சஸ்பெண்ட் செய்யப்பட்டுள்ளார்.

இந்த நபர் அண்மையில் தம்முடன் பொலிஸ் சேவையில் உள்ள சமகால அதிகாரி ஒருவரை சந்தித்து மன உளைச்சலுக்கு உள்ளாகியுள்ளதாக தெரிவித்து அந்த அதிகாரி தங்கியுள்ள கொழும்பில் உள்ள பொலிஸ் உத்தியோகபூர்வ இல்லத்தில் தங்கியுள்ளமை தெரியவந்துள்ளது. அதிகாரி ஒரு போக்குவரத்துப் பிரிவின் நிலைய அதிகாரி. சந்தேக நபர் கொழும்பில் உள்ள அதிகாரியின் உத்தியோகபூர்வ வாசஸ்தலத்தில் தங்கியுள்ளதாக தொலைபேசி வலையமைப்பு பகுப்பாய்வு மூலம் அதிகாரியின் தொலைபேசி அவரது தொலைபேசியுடன் இணைக்கப்பட்டிருந்தமை தெரியவந்ததையடுத்து அது தொடர்பில் அதிகாரியிடம் விசாரணைகளை மேற்கொண்டமை தெரியவந்துள்ளது.

இதற்கிடையில், போலீசார் நேற்று ஒரு புகைப்படத்தை ஊடகங்களுக்கு வெளியிட்டு, மற்றும் சர்ச்சைக்குரிய கொலை விசாரணையில் அந்த நபரை கைது செய்ய பொதுமக்களின் ஆதரவை கோரியுள்ளனர்.

கொள்ளுப்பிட்டி பொலிஸ் உத்தியோகத்தர் ஒருவரின் மூன்று கையடக்கத் தொலைபேசிகளும் அவர் தொடர்பில் ஏதேனும் தகவல் தெரிந்தால் தகவல் வழங்குமாறு பகிரங்கப்படுத்தப்பட்டன. தொலைபேசி எண்கள் 0742 226 022 /0718 591 492 /0718 594 455.