அவுஸ்ரேலிய அப்பிள் தோட்டத்தில் வேலை!! கொழும்பு டொக்டர் நடாத்திய திருவிளையாடல்! பெருமளவானவர்கள் பணம் இழந்தனர்!!
மருத்துவர் போல் நடித்து பலரிடம் பணத்தை மோசடி செய்த நபர் ஒருவர் ரிட்ஜ்வே லேடி ரிட்ஜ்வே சிறுவர் வைத்தியசாலைக்கு முன்பாக கைது செய்யப்பட்டதாக பொரளை பொலிஸார் தெரிவித்தனர்.
மருத்துவ உபகரணங்கள், மருத்துவர்கள் அணியும் சீருடை மற்றும் மருத்துவர்கள் பயன்படுத்தும் பல்வேறு நோய்கள் தொடர்பான அச்சிடப்பட்ட புத்தகங்களையும் பொலிஸார் கைப்பற்றினர்.
தேசிய வைத்தியசாலை மற்றும் ரிட்ஜ்வே லேடி ரிட்ஜ்வே சிறுவர் வைத்தியசாலை வளாகத்தில் மருத்துவர் போல சுற்றித்திரியும் சந்தேகநபர், வைத்தியசாலைக்கு நோயாளர்களைப் பார்க்க வருபவர்களிடம், அவுஸ்திரேலியாவில் உள்ள தனது மனைவியின் அப்பிள் தோட்டத்தில் இரண்டு மூன்று பேருக்கு வேலை வாய்ப்பு இருப்பதாகக் கூறி, நீண்டகாலமாக பலரிடம் மோசடி செய்து வந்துள்ளார் என்பது பொலிஸாரின் விசாரணையில் தெரியவந்துள்ளது.
மருத்துவமனை ஊழியர்களை குறைந்த பணத்தில் அழைத்துச் செல்லலாம் என்றும், ஏழை மக்களுக்கு வாய்ப்பு வழங்குவதே ஒரே நோக்கமாக இருப்பதால், ஆவணங்களுக்கு மட்டும் பணம் கொடுத்துவிட்டு வெளிநாடு செல்லலாம் என்றும் சந்தேக நபர் மக்களிடம் கூறியதாக போலீஸார் தெரிவித்தனர்.
சந்தேகநபரின் வைத்தியர் பதவி மற்றும் அவரது பேச்சு பாவனையால் ஏமாற்றப்பட்ட பலர் வெளிநாடு செல்லும் ஆசையில் பணம் கொடுத்துள்ளதாகவும் பொலிஸார் தெரிவிக்கின்றனர்.
