தமிழர் பகுதியில் AC பஸ்களில் நடக்கும் கேவலங்கள்!
நுவரேலியாவில் இருந்து ஹட்டன் நோக்கி பயணிக்கும் சொகுசு AC பேருந்தில், அதிகளவிலான பயணிகள் ஏற்றப்படுவதால் தங்களுக்கு பெரும் அசௌகரியம் ஏற்பட்டுள்ளதாக பயணிகள் குற்றம் சாட்டியுள்ளனர்.
சொகுசு AC பேருந்து எனக் கூறி பயணிகளிடம் ரூ.350 கட்டணம் வசூலிக்கப்படுவதாகவும், ஆனால் அதற்கேற்ற வசதிகள் வழங்கப்படுவதில்லை எனவும் அவர்கள் தெரிவிக்கின்றனர்.
குறிப்பாக, நான்கு பேர் அமர வேண்டிய இருக்கையில் ஆறு பேர் அமர வைக்கப்படுவதாகவும், பேருந்தின் ஏனைய பகுதிகளிலும் பயணிகள் நெருக்கமாக நின்று பயணிக்க வேண்டிய நிலை ஏற்பட்டுள்ளதாகவும் பயணிகள் குற்றம் சுமத்தியுள்ளனர்.
அதிக கட்டணம் வசூலிக்கப்படும் நிலையில், உரிய இருக்கை வசதி, பயணிகள் நெரிசல் கட்டுப்பாடு மற்றும் பாதுகாப்பு ஏற்பாடுகள் உறுதி செய்யப்படவில்லை எனவும் அவர்கள் தெரிவிக்கின்றனர்.
இந்த விடயம் தொடர்பாக நடத்துனரிடம் கேள்வி எழுப்பியபோது, பயணிகளுடன் முரண்படும் வகையில் அவர் நடந்துகொண்டதாகவும் சில பயணிகள் குற்றம் சாட்டியுள்ளனர்.
இதனிடையே, பேருந்தில் அனுமதிக்கப்பட்ட அளவை விட அதிகமான பயணிகள் ஏற்றப்படுகிறார்களா, வசூலிக்கப்படும் கட்டணம் உரியதா, பயணிகளின் பாதுகாப்பு உறுதி செய்யப்படுகிறதா என்பது தொடர்பில் சம்பந்தப்பட்ட அதிகாரிகள் விசாரணை நடத்த வேண்டும் என கோரிக்கை விடுக்கப்பட்டுள்ளது.
விபத்து போன்ற அசம்பாவிதங்கள் ஏற்படும் பட்சத்தில், அதற்கு யார் பொறுப்பு ஏற்கப் போகின்றனர் என்ற கேள்வியையும் பயணிகள் எழுப்பியுள்ளனர்.
எனவே, தனியார் போக்குவரத்து சங்கமும் சம்பந்தப்பட்ட அதிகாரிகளும் இந்த விடயத்தை உடனடியாக கவனத்தில் கொண்டு விசாரணை நடத்தி, பயணிகளுக்கு உரிய வசதிகளையும் பாதுகாப்பான போக்குவரத்து சேவையையும் உறுதி செய்ய நடவடிக்கை எடுக்க வேண்டும் என பயணிகள் கோரிக்கை விடுத்துள்ளனர்.
