ஹொரண டிப்போவுக்குச் சொந்தமான இங்கிரிய – கரதன இலங்கை போக்குவரத்துச் சபை பேருந்தின் சாரதி மற்றும் நடத்துனர் மீது, கழிவு எண்ணெய் கலந்த மலம் மற்றும் கற்களால் தாக்குதல் நடத்திய சம்பவம் தொடர்பில் தனியார் பேருந்து சாரதி ஒருவரும், அப்பேருந்தின் உரிமையாளரும் கைதுசெய்யப்பட்டுள்ளதாக இங்கிரிய பொலிஸார் தெரிவித்துள்ளனர்.
தாக்குதலுடன் தொடர்புடையவர் எனக் கூறப்படும் தனியார் பேருந்தின் சாரதி கைதுசெய்யப்பட்டதை அடுத்து, அப்பேருந்தின் உரிமையாளர் இங்கிரிய பொலிஸ் நிலையத்திற்கு அருகில் வந்துள்ளார்.
இதன்போது, சம்பவம் தொடர்பில் முறைப்பாடு செய்வதற்காகப் பொலிஸ் நிலையத்திற்கு வந்திருந்த இலங்கை போக்குவரத்துச் சபை பேருந்தின் சாரதி மற்றும் நடத்துனருடன் தனியார் பேருந்தின் உரிமையாளர் மோதலில் ஈடுபட்டுள்ளதாகப் பொலிஸார் கூறியுள்ளனர்.
அவ்வேளையில் தலையிட்ட பொலிஸ் உத்தியோகத்தர் ஒருவரைத் திட்டி அச்சுறுத்தி, அவரது கடமைக்கு இடையூறு விளைவித்த குற்றச்சாட்டின் பேரிலேயே பேருந்தின் உரிமையாளரும் கைதுசெய்யப்பட்டுள்ளார்.
கழிவு எண்ணெய் கலந்த மலம் மற்றும் கற்களால் மேற்கொள்ளப்பட்ட தாக்குதலில் காயமடைந்த இலங்கை போக்குவரத்துச் சபை பேருந்தின் சாரதியும் நடத்துனரும் நாகொட வைத்தியசாலையில் அனுமதிக்கப்பட்டுள்ளனர். அவர்களுள் நடத்துனரின் நிலைமை கவலைக்கிடமாக உள்ளதால், அவர் தீவிர சிகிச்சைப் பிரிவில் அனுமதிக்கப்பட்டு சிகிச்சை பெற்று வருகின்றார்.
கைதுசெய்யப்பட்ட இரண்டு சந்தேகநபர்களும் புதன்கிழமை (28) ஹொரண நீதவான் நீதிமன்றத்தில் முன்னிலைப்படுத்தப்படவுள்ளனர்.
