நக்கிள்ஸ் வனப்பகுதியில் இரகசியமாக வாழ்ந்து வந்த நிலையில் அண்மையில் மீட்கப்பட்ட 15வயது சிறுமியான தாயும், சுமார் இரண்டு மாதங்களான அவரது குழந்தையும் தொடர்ந்தும் கண்டி தேசிய வைத்தியசாலையில் தங்கி சிகிச்சை பெற்று வருவதாக காவல்துறையினர் தெரிவித்துள்ளனர்.
இந்தச் சம்பவம் தொடர்பாகக் காவல்துறையினர் மேற்கொண்ட மேலதிக விசாரணைகளின் போது மேலும் பல தகவல்கள் கண்டறியப்பட்டுள்ளன.
காதல் தொடர்புகள் மற்றும் உறவுமுறை
காவல்துறை விசாரணைகளின்படி, குறித்த சிறுமிக்கும் குழந்தையின் தந்தை எனக் கூறப்படும் 23 வயது இளைஞனுக்கும் இடையில் 2023 ஆம் ஆண்டு முதல் காதல் தொடர்பு இருந்துள்ளமை தெரியவந்துள்ளது. அக்காலப்பகுதியில் இருவருக்கும் இடையில் பாலியல் உறவுகளும் இருந்துள்ளதாகக் காவல்துறையினருக்குத் தகவல் கிடைத்துள்ளது.
அத்துடன், இவர்களுக்கு உதவி ஒத்தாசை வழங்கிய சந்தேகத்தின் பேரில் கைது செய்யப்பட்டு தற்போது விளக்கமறியலில் வைக்கப்பட்டுள்ள 36 வயதுடைய நபருடனும் குறித்த சிறுமி காதல் தொடர்பு வைத்திருந்தமை விசாரணைகளில் வெளிச்சத்திற்கு வந்துள்ளது.
இதில் விசேட அம்சம் என்னவென்றால், சம்பந்தப்பட்ட இவ்விரு நபர்களும் ஒருவருக்கொருவர் உறவினர்கள் என்பதைக் காவல்துறையினர் அடையாளம் கண்டுள்ளமையாகும்.
வனப்பகுதிக்குத் தப்பிச் செல்லுதல்
சிறுமி கர்ப்பமடைந்துள்ளதை அறிந்ததன் பின்னர், அவர் 23 வயது இளைஞனுடன் கடந்த மே மாதமளவில் வீட்டிலிருந்து காணாமல் போயிருந்தார். இது தொடர்பாகச் சிறுமியின் பெற்றோரினால் அதே மாதத்தில் உடதும்பர காவல் நிலையத்தில் முறைப்பாடு ஒன்றும் பதிவு செய்யப்பட்டிருந்தது.
இவர்கள் இருவரும் காணாமல் போனதைத் தொடர்ந்து, 36 வயதுடைய நபரும் அவர்களைத் தேடி வனப்பகுதிக்குச் சென்றுள்ளார். காவல்துறையினர் தெரிவிப்பதன்படி, இவ்விரு நபர்களும் சிறுமியான தாய் மற்றும் குழந்தையுடன் பல மாதங்களாக வனப்பகுதிக்குள் ஒன்றாக வாழ்ந்து வந்துள்ளனர்.
காட்டிற்குள் வாழ்க்கை நடத்திய விதம்
காட்டிற்குள் தங்கியிருந்த காலம் முழுவதும் தமது ஜீவனோபாயத்திற்காக அவர்கள் கள் இறக்கும் தொழிலில் ஈடுபட்டுள்ளனர். அவ்வாறு பெற்றுக்கொள்ளும் கள்ளை அருகிலுள்ள கிராமத்திலுள்ள நபர் ஒருவருக்கு வழங்கி, அந்நபரின் ஊடாகத் தமக்குத் தேவையான உணவுப் பொருட்கள் மற்றும் ஏனைய அத்தியாவசியப் பொருட்களை வனப்பகுதிக்குள் வரவழைத்துக்கொள்ள அவர்கள் நடவடிக்கை எடுத்துள்ளதாகக் காவல்துறை ஊடகப் பிரிவு மேலும் குறிப்பிட்டுள்ளது.
சம்பவம் தொடர்பாக உடதும்பர காவல்துறையினர் மேலதிக விசாரணைகளை முன்னெடுத்து வருகின்றனர்.





