கர்ப்பமான மலர்மதியுடன் ஏன் தப்பிச் சென்றேன்?: கொள்கலனில் மறைந்து வெளிநாடு செல்ல முயன்ற முன்னாள் போராளி பகீர் தகவல்!

கொழும்பு துறைமுகத்திலிருந்து புறப்பட்ட கப்பலின் கொள்கலனில் மறைந்திருந்து மலேசியாவுக்கு தப்பிச் செல்ல முற்பட்ட ஜோடி இலங்கைக்கு நாடு கடத்தப்பட்டுள்ளது. அவர்கள் குற்றப்புலனாய்வு திணைக்களத்தினால் கைது செய்யப்பட்டனர். கைது செய்யப்பட்ட கணவன், விடுதலைப் புலிகள் அமைப்பின் முன்னாள் போராளி என்பதால், அவர் பயங்கரவாத தடைச்சட்டத்தின் கீழ் தடுத்து வைக்கப்படலாமென அஞ்சப்படுகிறது.

கணவர் 39 வயதான ஜெயகுமார் தருமராசா ஆவார். இவர் திருகோணமலையைச் சேர்ந்தவர். விடுதலைப் புலிகள் அமைப்பில் இராணுவப் பயிற்சி பெற்று, அரசாங்கத்தின் புனர்வாழ்வு பெறாதவர் என்பதும் விசாரணையில் தெரியவந்துள்ளது. மனைவி மலர்மதி ராஜேந்திரன். அவர் இரத்தினபுரியை வசிப்பிடமாகக் கொண்ட 26 வயதுடையவர். தற்போது அவர் கர்ப்பமாக இருப்பதாகவும் தெரியவந்துள்ளது.

கணவர் கொழும்பு துறைமுகத்தில் கொள்கலன் போக்குவரத்து வாகனம் ஒன்றின் சாரதியாக பணியாற்றி வருகிறார். தனியார் நிறுவன ஊழியராக பணிபுரியும் இவர், துறைமுகத்தை சுற்றி கொள்கலன்களை நகர்த்தும் லொறியில் சாரதியாக பணியில் ஈடுபட்டு வந்ததும், மலேசியாவுக்கு கொள்கலன் பெட்டியில் பதுங்கி மனைவியுடன் தப்பிச் செல்ல திட்டமிட்டதும் தெரியவந்தது.

நீண்ட நாட்களாகச் செய்த திட்டத்தின்படி, கொழும்பு துறைமுகத்தில் நங்கூரமிட்டிருந்த டுபாய் நிறுவனத்துக்கு சொந்தமான கப்பலில் ஏற்றப்படவிருந்த வெற்று கொள்கலனில் அவர் தனது கர்ப்பிணி மனைவியுடன் ஏறினார். இருவரம் மறைந்திருந்த கெள்கலன் கப்பலில் ஏற்றப்பட்டது.

இதற்காக தனது மனைவியை கொள்கலனில் மறைத்து கொழும்பு துறைமுகத்திற்கு அழைத்து வந்துள்ளதாக விசாரணையில் தெரியவந்துள்ளது. கடந்த ஜனவரி 30ஆம் திகதி கொழும்பு துறைமுக வளாகத்தில் இருந்து கொள்கலன் டிரான்ஸ்போர்ட்டரை எடுத்துச் சென்று கழுவி சுத்தம் செய்தல், இன்ஜின் ஓயில் உள்ளிட்ட பராமரிப்பு பணிகளை மேற்கொள்வதற்காக சென்றுள்ளார். மீண்டும் கடந்த 31ம் திகதி டிரான்ஸ்போர்ட்டரை துறைமுக வளாகத்திற்கு கொண்டு வந்தார். துறைமுக காவலர்களிடம் சிக்காமல் இருப்பதற்காக மனைவி அங்கு மறைந்திருந்து துறைமுக வளாகத்திற்குள் நுழைந்துள்ளார். பின்னர், இருவரும் கொள்கலன் ஒன்றில் மறைந்து, கப்பலில் ஏற்றிச் சென்றதாக விசாரணையில் தெரியவந்துள்ள நிலையில், துறைமுக வளாகத்தில் இதற்கு யாரோ உதவி செய்துள்ளார்களா என்ற சந்தேகமும் எழுந்துள்ளது.

“ஒரு கொள்கலனை ஒரு கப்பலில் ஏற்றும்போது, ​​அதன் கதவுகள் பூட்டி மூடப்படும். அவை சரிபார்க்கப்பட்டு கொள்கலன் கப்பல்களில் ஏற்றப்படுகின்றன. இந்த கொள்கலனை இப்படித்தான் ஏற்ற வேண்டும். ஆனால் மூடிய கொள்கலன் பெட்டியில் நீண்ட நேரம் தங்குவது கடினம். கொள்கலன் பெட்டியில் காற்றோட்டம் இல்லாததால் உயிருக்கு ஆபத்து ஏற்படும். ஆனால், கொழும்பு துறைமுகத்தில் இருந்து கொள்கலன் பயணத்தைத் தொடங்கிய சில நாட்களுக்குப் பிறகு, கொள்கலன் கதவு திறந்து கிடப்பதைப் பார்த்த கப்பலின் ஊழியர்கள் இருவரையும் பிடித்தனர்,” என்று இது குறித்து விசாரணை செய்யும் விசாரணையாளர் ஒருவர் தெரிவித்தார்.

கணவனும் மனைவியும் பதுங்கியிருந்த கொள்கலன் கதவு திறக்கக்கூடிய இடத்தில் காணப்பட்டதால் விசாரணை அதிகாரிகளின் விசேட கவனமும் பெற்றுள்ளது.

கொள்கலனில் கதவு திறந்திருந்த நிலையில் இது குறித்த சில சந்தேகமடைந்த பணியாளர்கள் சோதனையிட்டபோது, உள்ளே பதுங்கியிருந்த ஜோடியை கண்டனர். இது குறித்து கப்பலின் கப்டனிடம் கூறினர். அவர்களை கப்டன் அலுவலகத்திற்கு அழைத்துச் சென்று விசாரித்தபோது, மலேசியாவிற்கு தப்பிச் செல்ல கொள்கலனில் பதுங்கியிருப்பதாக கூறினார். மலேசியத் துறைமுகத்தில் கப்பல் நிறுத்தப்பட்டதையடுத்து கப்பலின் கப்டன் தம்பதிகளை மலேசியப் பாதுகாப்புப் படையினரிடம் ஒப்படைக்க முயன்றார்.

ஆனால் இருவரையும் மலேசிய பாதுகாப்பு படையினர் ஏற்கவில்லை. எனவே, தம்பதியுடன் சிங்கப்பூர் உள்ளிட்ட பல நாடுகளுக்கு பயணம் செய்துள்ளனர். அந்தத் தம்பதிகளை அந்த நாடுகள் எதுவும் ஏற்கவில்லை. இறுதியாக சீனாவின் ஷாங்காய் நகரில் கப்பல் தரித்த பிறகு, மனைவி கர்ப்பமாக இருந்ததால், அவரது பாதுகாப்பு கருதி சீன அதிகாரிகள் தம்பதியை ஏற்றுக்கொண்டனர். ஒரு வாரத்திற்கு முன்னர் ஷாங்காய் அதிகாரிகளால் கைது செய்யப்பட்ட தம்பதியினர், கடந்த 24ஆம் திகதி சீனாவில் இருந்து நாடு கடத்தப்பட்டு இலங்கை வந்தடைந்தனர்.

24ஆம் திகதி அதிகாலை 5.01 மணியளவில் கட்டுநாயக்க சர்வதேச விமான நிலையத்தில் தரையிறங்கிய ஸ்ரீலங்கன் எயார்லைன்ஸுக்குச் சொந்தமான யு.எல். 867 விமானத்தில் வந்த தம்பதிகள் குற்றப் புலனாய்வுத் திணைக்களத்தின் வர்த்தக மற்றும் கடத்தல் விசாரணைப் பிரிவினரால் கைது செய்யப்படவுள்ளனர்.

தற்போது 72 மணித்தியாலங்கள் தடுப்புக் காவலில் வைக்கப்பட்டு விசாரணைகள் நடத்தப்பட்டு வருவதாகவும், எதிர்காலத்தில் கணவர் தடுத்து வைக்கப்பட்டு பயங்கரவாதத் தடைச் சட்டத்தின் விதிகளின்படி மேலதிக விசாரணைகள் நடத்தப்படும் எனவும் தகவல்கள் தெரிவிக்கின்றன.

“வேலை வாய்ப்புக்காக மலேசியா செல்லும் நோக்கத்தில் கொள்கலன் பெட்டிக்குள் ஒளிந்து கொண்டோம். கப்பல் முதலில் மலேசியா செல்கிறது என்பது தெரிந்தது. மலேசியாவில் உள்ள துறைமுகத்தில் கப்பல் நிறுத்தப்பட்டபோது நாங்கள் பெட்டியிலிருந்து குதிக்க திட்டமிட்டோம். கொழும்பு துறைமுகத்தில் இருந்து மலேசியா செல்ல அதிக காலம் எடுக்காது என்பதால், சாப்பிடவும் குடிக்கவும் பிஸ்கட் பாக்கெட்டுகளுடன் சில தண்ணீர் போத்தல்களையும் வைத்திருந்தோம்“ என இந்த தம்பதியினர் தெரிவித்துள்ளனர்.