அப்பா டீசல் வாகனத்திற்கு மண்ணெண்ணை ஊற்றி ஓடுவார்!! 4 வயது மகனால் அலுவலகத்திற்கு காட்டிக் கொடுக்கப்பட்ட அரச சாரதி!!

அண்மையில் அலுவலகம் ஒன்றில் ஒளிவிழா நடைபெற்றுள்ளது. குறித்த அலுவலக ஒளிவிழாவுக்கு தமது பிள்ளைகளையும் அலுவலர்கள் கொண்டு வந்துள்ளார்கள். அந்த அலுவலகத்தில் வாகனம் ஒன்றின் சாரதியாகக் கடமையாற்றும் ஒருவரும் தனது மகனை ஒளிவிழாவுக்கு அழைத்து வந்துள்ளார். அங்கு வந்த மகன் அங்குள்ள அலுவலர்களுடன் மிகவும் சகஜமாகப் பழகத் தொடங்கியுள்ளார். அதன் பின்னர் அங்குள்ள அலுவலர்களுக்கு தனது அப்பாவின் வீரதீரப் பிரதாபங்களை கூறியுள்ளார்.

வீட்டில் தன்னுடன் சேர்ந்து அப்பா டான்ஸ் ஆடுவார் என அப்பாவின் விளையாட்டுக்களை கூறத்தொடங்கிய மகன் தனது அப்பா வீட்டில் மண்ணெண்ணை வாங்கி வைத்துள்ளதாகவும் அந்த வாகனத்தை (வெளியில் நின்ற அரச வாகனத்தைச் சுட்டிக் காட்டி) கொண்டு வந்து வீட்டில் மண்ணெண்ணை விட்டுவிட்டே ஓடுவதாகவும் கூறியதால் அலுவலர்கள் சிலர் அதிர்ச்சியடைந்துள்ளனர். குறித்த சாரதி அலுவலகத்தில் சிலருடன் முரண்பட்டு வந்ததால் மகனின் கூற்று அங்குள்ள சிலருக்கு தேன் போல் பாய்ந்துள்ளது. மகனை அவர்கள் மீண்டும் மண்ணெண்ணை விட்டு ஓடுவது தொடர்பாக கூறச் செய்து அதனை வீடியோவாகப் பதிவு செய்து திணைக்களத் தலைவருக்கு அனுப்பியுள்ளதாகத் குறித்த அலுவலகத் தகவல்கள் தெரிவிக்கின்றன. 

இருப்பினும் திணைக்களத்தலைவரிடமிருந்து எந்தவித அசுமாத்தமும் காணப்படவில்லை என குறித்த அலுவலகத் தரப்புக்கள் மூலம் தெரியவந்துள்ளது.