இலங்கையில் பிறந்து, 12 வயதில் அகதியாக ஜேர்மனி சென்ற ஈழ தமிழர் ஒருவர், இன்று பிரித்தானியாவின் சில்லறை வணிக துறையில் உயரிய அங்கீகாரத்தை பெற்றுள்ளார்.
இவர்தான் தொழிலதிபர் ஜெயசீலன் தம்பிராஜா. பிரித்தானியாவில் வழங்கப்படும் Asian Trader of the Year 2025 விருதை வென்று சாதனை படைத்துள்ளார்.
1976ஆம் ஆண்டு பிறந்த இவர், நாட்டில் நிலவிய போர்ச் சூழல் காரணமாக பெற்றோரிடம் இருந்து பிரிந்து தனியாக ஜேர்மனிக்கு சென்றார்.
பின்னர் அங்கு கல்வி கற்ற அவர், 2000ஆம் ஆண்டு மேலதிக கல்விக்காக பிரித்தானியா சென்றார்.
லண்டனின் பேர்ன்ட் ஓக் பகுதியில் உள்ள சிறிய அங்காடி ஒன்றில் பகுதி நேர பணியாளராக வாழ்க்கையை தொடங்கினார். படிப்பை முடித்த பின்னர், அதே அங்காடியை விலைக்கு வாங்கி சொந்த வணிக பயணத்தை ஆரம்பித்தார்.
ஒரு சிறிய கடையில் தொடங்கிய அவரது முயற்சி இன்று 20 அங்காடிகளை கொண்ட பெரிய வணிக குழுமமாக வளர்ந்துள்ளது.
MSP & Noble Group நிறுவனத்தின் கீழ் இயங்கும் இந்த அங்காடிகளில் 180 இற்கும் மேற்பட்டோர் பணியாற்றுகின்றனர்.
பழைய உணவகங்கள், தீயணைப்பு நிலையங்கள், வாகன காட்சியகங்கள் போன்ற கட்டிடங்களை நவீன அங்காடிகளாக மாற்றி வணிகம் செய்வது இவரது தனித்துவமான அணுகுமுறையாகும்.
